Vai in HomePage | Torna indietro

Ambito di Ricerca:La lingua locale: testi e voci

L'immaginario aliese, by Didacus_10

nr. d'ordine 1

Springalia Buses Delicacies

Vinni lu tiempu c’a l’Antica Nanna

Cci sciurìa nna li manu la ferra

e a San Giusippuzzu, a lu Burduni,

Cci sciurìa nna li manu lu vastuni,

e a San Giuseppi di lu Bagnascu,

l’uocchi Cci lucianu e ‘un era luscu…

E si si’ amanti di poesia

e lu si’ puru di funci di ferra,

viri sciuruta tutta la campagna.

La nanna lassava la quasetta,

lassava li fierri e pigghiava li busi,

e, un puntu a carcagnu, un puntu a quasetta,

gghiòmmari di lana maritata

scuddariava cuomu fussiru strùmmuli…

Aspetta ca finisciu la busata!…

cci dissi la mugghieri a lu maritu,

ca cci ittava la porta ‘n terra,

a du’ uri di notti, assicutatu,

di li brianti di Aria a la ferra….

Arriva la vigilia d’Ascenzioni

e lu Signuri lieggiu s’àvìa a tèniri,

pi’ spiccari lu vuolu pi’ li Cieli

di la terrazza di lu Cravaniu,

unni ‘n pricissioni lu purtavanu;

li cavatieddi si priparavanu

cu scura farina di tumminìa

e a la busa s’agghiummariavanu

di paraccu sfasciatu e nostalgia

di la belle époque di la vita…

Lu tiempu vinni, asciuttu e profumatu

di inestra e di rosi spampinati

ca, toties quoties, s’arricampava,

lu miraculusu Fra’ Binnardu,

ca crapi e piecuri miracolàverat

di la patologia di lu chiuvardu

a li Principi di Santu Vicienzu,

e, taliannu nn’avanti, a cu viri?!

‘d’insigne parentado, quel portento’…

O sanguis meus…, cci vinni di lu piettu,

finalmenti qualcosa nni nni vinni,

di l’arii di destra e di sinistra,

di lu Cravaniu e di la Funtanedda,

di nni la Chiazza e di la Tribunedda,

duoppu tant’anni di mal’annata,

cu la cugghiuta di sta stasciunata

‘na bedda ‘mposta àm’a ad armari,

cu sìdici viesti e du’ urdunari,

sacchi, visazzi e visazzuotti, chini

di ciciri, favi e tallarò

e ‘n frotta ‘ntipàri pi Gibilimanna

pi ghir’a diri grazzi a la Madonna

ca di li vienti la rosa cumanna...

Didacus
__________________________

nr. d'ordine 2

Cara al sol, querida Alia, casas

Casi, a facci di suli, suvrastanti,

la lista di Lìlici , all’Alia…

Vulissi stari, in una di sti casi,

nni l’autunnu di la me’ etati,

pi bona parti disabitati,

cuomu, del restu, tutta la citàti,

cu picchi e cucchi, a lu Rabbatieddu…

Restaurati, cu marchi e cu dòllari,

di li transoceànici emigrati,

chi, di luntanu, lu suli, si guòdinu

di Maccarruni e di lu Furnu Elettricu…

Di li curti iurnati di lu mmiernu,

quannu tardu agghiorna e prestu scura,

di li primaveri profumati,

di barcu e di sciuri di menziuornu…

Li viecchi, nni li misi senza erre,

li rimanenzi, di suli, si pìgghianu,

di li misi di l’annu e di la vita,

asciucannusi l’ossa e addummisciènnusi…

Vulissi stari, in una di sti casi,

e affacciàrami a quarchi finistruni

chi guarda lu Sud di l’Italia,

cu Cammarata e Santa Rusulia,

pi putiri diri, ‘n puisìa:

‘Chi suli cauru, chi aria, chi sciauru!’…

Chiùviri l’uocchi, in una di sti casi,

cu lu liettu, a facci di suli,

e, a tramuntana, lu cataliettu…

Didacus
__________________________

nr. d'ordine 3

‘Long and winding road’ endecasyllables

Cci n’è di strata, stramma, e fora manu,

pi’ putiri tuppiari a la to’ porta

e gridàriti: Cori di fierru!

E si campassi quantu un caimanu

e, no, quantu mi tocca di campari,

cuomu Macca e cuomu McCartney,

vistu ca John e George, si nni ieru,

lassànnumi, sulu, cu Ringo,

scurdari, ‘un mi putissi, dda stratuzza,

dda Serpentine, pi’ nnenti, latina,

cuomu la Penny Lane o l’Abbey Road…

Scumpariri, my love, nun putissi,

di la memoria di lu hard disk

di la me’ vita di Beetle and Beatle…

Chi, marusu, chi timpistati,

chi allucinanti, forti, grannuliata,

ca, forsi, cuntari, pututu, ‘un avissi,

si Piccadilly ‘un m’avissi aiutatu,

nni dda notti, chi chiamu, di Horror…

‘Ahi quanto a dir qual era è cosa dura,

esta selva, selvaggia e aspra e forte,

che nel pensier rinova la paura…’,

ora ca mi la viu di la radura

di un centesimu pianu di palazzu,

disegnatu da un pazzu italianu,

chi sciarda la vita a Manhattan,

nni la City di Londra, a Los Angeles,

attraverso li Google Maps,

por todos, a portada, de mouse…

Didacus
__________________________

nr. d'ordine 4

1 Lauda Jerusalem

Adura, Rabbatieddu, lu Signuri,

Adura, Sant’Anna, lu to’ Diu,

lu stessu Diu, ca quannu si fa notti,

mascu e stanga ti metti a li porti,

e sta cu tìa, Gesuzzu e Maria,

mentri ‘nni la quarara, quarquaria

la pitanza chi Nina arrimina…

Dintra ti stenni la Figghiulanza,

di fora ti binidici lu lauri

contr’armaluzzi e mali pirsuni,

quannu cci sunnu li Rogazzioni

e tutti li minuti e tutti l’uri

Cu ‘u gnitu, t’astuta la calura,

cu ‘na sciatata sciogghi la tassura…

Sutta la nivi cci metti lu pani,

di sutta l’acqua cci leva la fami…

“Adura lu Signuri e va’ lavura!..”

2 Tempus Bipharorum

A ttiempu di bifari, la matina,

v’a faccia lu scarparu nni la chiusa,

sutta la lista, supra lu paisi,

ca nun cci scappa, picchì è beni ‘n vista.…

Ma ’un àvi paci, picchì , cu la vigna,

cci avi du’ pieri di ficu bifari…

niuri, un giuviettu e granni , ‘ na palla,

ca puru di dintra sunnu visibbili.

E’ veru ca Pippina àvi lu zuccaru,

ma è puru veru ch’è a lu sestu misi…

Ca Peppi sta gghiennu pi’ li ficu

tutti lu sannu, ma di nuddu è vistu,

d’altronde, puru, l’autri, ànnu la vigna

cu li ficu nascosti tra li pampini…

Ma quannu parti e quannu ritorna

cu lu panaru chinu a la curma,

cu pampini di viti, cupunatu,

pari c’avissi soli di gomma

‘nveci di scarpuna cu li tacci,

picchì si qualcunu si nn’adduna,

‘un cci po’ diri cosa, cci li duna…

3 Cantu d’amuri e di rancuri

Ora ca passà lu quarararu,

sapi chi cci dicu, gnira ma’?…

cu figghi e cu mugghieri ia mi nni vaiu…

E senza di Vassìa… lu sapi Diu…

Salutu sti tirrazzi a gghiardinu,

tutti di barcu e sciuri di menz’iuornu

e nni dda citatedda mi nni vaiu

unni, cu la grann’arti e li biddizzi,

‘un manca lu pani e la sasizza,

anchi, si a puostu di finuocchiu ‘n granu,

cci truovi l’agghia, nna lu capuliatu.

Ora ca Peppi fici quarant’anni

e puru pi’ iddu la cira squagghia,

lu sapi chi cci dicu, gnira ma’?

mi sientu ancora di curriri a lu Paliu,

cuom’Acìtu, ca vinni di ‘na terra

ièmmula nostra pi’ giòi e dulura.

Ora ca passà lu quararu,

lu sapi chi cci dicu, cara ma’?!…

Ia lassu stu iardinu accussì raru

e nna lu Chianti…magghioli v’a chiantu…

To’ nora, ch’èni puru attitulata

e sapitura, cuomu casalinga,

‘un si cuntenta cchiù di ‘na putiedda,

ma a la Gea voli iri e nni Veggè,

cu machina, carrellu e…caminari

d’arrietu e sorpassari li mugghieri

di don nìnnari, mièdici e spizziali,

ch’ànnu sempri cchiù cosi d’accattari,

e a nui nni dicinu di nun manciari,

mentri iddi si fùinu un Papatu…

Ora ca passà lu quarararu,

lu sapi chi cci dicu, cara ma’?!…

avanti ca nni scura nna li pieri,

‘un puostu a lu suli mi vuogghiu fari…

Pi’ Vassìa c’è la Casa di l’anziani…

e a lu pinzieri mi sientu mancari…

Ma si vinciemu di Siena lu paliu,

a mea ma’ viegnu a pigghiu ‘n pompa magna

e la puortu unni Santa Caterina

nascì, criscì, ma nun cci vosi mòriri

e to’ figghiu cci fici lu surdatu,

e di turnari a Lalia ‘un si nni parra…

4 Elysian Fields

La to’ facci scavata e muggiadìna

di patri di famigghia c’’un s’arrenni,

cu cuoppula a puostu di turbanti,

m’assicuta cuomu fantasma,

mutu, s’’un fussi pi’ lu muttu anticu:

“Curri quantu vùa ca cca t’aspiettu…”

Tantu ca, caru patri, mi cunvinciu,

o vuogghiu o ‘un vuogghiu, a fari stu viaggiu

di Baton Rouge a Cuozzu di Cìciru,

di Cuòzzu di Cìciru a Li Chianchiteddi…

Chianti permanenti di l’Alisi,

chianti di grapes e di lacrim’amari…

Chianciu davanti a dd’asciutti purpàni,

e li vagnu di chianti americani…

Chianciu tantu e pi’ quantu aiu làcrimi…

Pua un pugnu di terra mi pigghiu

e a lu chaffeur cci dicu:”Let’s go!”

e drittu a Borsellinu mi nni vaiu…

Villa Dafne aspittava pi’ la dinner…

E ia, Mr.Lino, on line, pagare….

5 Corollarium

Cu cunta, cci iunci, dici l’anticu,

ma, ia , vi giuru, nenti cci iuncìu,

a chiddu chi mi vinni di lu funnu

di lu cori, ch’è cuomu nna sterna,

unni cala lu quàtu Mnemòsine,

matri amurusa di li novi Musi

e di ddi prisuntusi cuom’a mia

ca ‘mpettanu pi’ dilla ‘n poesia.

Didacus
__________________________

Vai alle altre raccolte:

Waiting rain_Didacus

L'immaginario aliese nella poesia_1	L'immaginario aliese, by Didacus _11
L'immaginario aliese nella poesia_2	L'immaginario aliese, by Didacus _12
L'immaginario aliese, by Didacus _1	L'immaginario aliese, by Didacus _13
L'immaginario aliese, by Didacus _2	L'immaginario aliese, by Didacus _14
L'immaginario aliese, by Didacus _3	L'immaginario aliese, by Didacus _15
L'immaginario aliese, by Didacus _4	L'immaginario aliese, by Didacus _16
L'immaginario aliese, by Didacus _5	L'immaginario aliese, by Didacus _17
L'immaginario aliese, by Didacus _6	L'immaginario aliese, by Didacus _18
L'immaginario aliese, by Didacus _7
L'immaginario aliese, by Didacus _8
L'immaginario aliese, by Didacus _9

Edizione RodAlia - 13/05/2012

pubblicazione consultata 2218 volte

totale di pagine consultate 911651