Quannu nascìu, me Patri era luntanu,

pi fari lu duviri di surdatu

e 'nta na littra scrissi di sò manu

ca nun sapia s'avissi riturnatu.

Finì la guerra e reduci e firiti

turnaru ad'abbrazzarisi a li figghi,

turnaru a li mugghieri li mariti,

si li vasaru cu milli amminzigghi.

Ma di me Patri nun si sappi nenti,

si l'agghiuttì la furia di la guerra,

e, comu tanti autri nnuccenti,

nun potti riturnari a la so terra.

Haiu 'nta lu me cori gran duluri,

d'aviri paci nun truovu nuddu viersu,

peni un mi potti dari e mancu amuri

ca, a causa di la guerra, fù dispiersu.

Dispiersu, 'nta na terra furastera,

forsi affamatu e chinu di tirruri,

luntanu di la terra sua sincera,

senza famigghia, senza casa e amuri.

Me Nanna sinni iu diciennu: figghiu

picchi un turnasti cchiù 'nta li me vrazza?

La guerra t'affirrau comu lu nigghiu

ca palummedda afferra, scanna e strazza!

Me Matri, puvuredda, aspetta ancora

di vidiri lu sò beni,

ed' ogni sira affaccia all'antalora,

ma iddu nun torna... e criscinu li peni!

Cu fù chi m'addutà sta mala sorti?

Ca m'è purtari fina 'nta la fossa?

Cu mi la detti sta cunnanna a morti

d'un vidiri a me Patri 'ncari ed'ossa?

Na vuci di lu scuru m'arrispunni,

vuci sicura, scanusciuta e forti,

ca 'nta lu cori cchiù pena m'infunni

picchì cunferma la me malasorti:

"Fu l'omu cchiù fitenti di la terra,

c'aviennu gran disiu di cumannari,

senza pinzari a nenti dissi: guerra

e detti fuocu a terra, cielu e mari".

O Diu, ca di lu cielu tuttu vidi,

aiutalu, s'è vivu a riturnari.

S'è muortu t'addumannu cu gran fidi:

all'arma sua la paci tu cci à dari.

Dammi un signali di la tò putenza,

duna risposta a st'arma dispirata,

dimmi s'è ancora prontu a la partenza

o si arriposa ....sutta na valata!

Cirinè
_______________________

Matri nascisti 'nta na terra amica

biniditta di Diu e di la natura,

ma la sorti, ca a tia ti fù nnimica,

ti cunnannau a na malavintura.

Tu, ca p' amari lassasti patri e matri,

li frati, la tò terra e li tò amici,

vinisti 'nta na terra tutta petri

unni si campa a stienti e sacrifici.

La mala sorti t'arrubbà l'amuri;

chidd'omu ca pi tia valia un tesoru,

e ti lassau cu du criaturi

ca cuntanu pi tia cchiossà di l'oru.

Li soggiri ti tinniru pi figghia,

cu gran rispiettu e cunsidirazioni,

e divintasti riggina di famigghia

di vicinatu e di pupulazioni.

Li viecchi li sirvisti cu decoru,

'nfina a la morti, cu gran divuzioni

e iddi ti lassaru un gran tesoru:

di tuttu l'Alia stima e ammirazioni.

Nni masticasti di muccuna amari

pi dari aiutu a parienti ed' amici

e, senza ricumpenzi né dinari,

tu dasti aiutu a poviri e 'nfilici.

'Mpittasti cu duttura e cu avvucati,

cu sinnaci, 'mpiegati e funzionari.

Pi dari aiutu a viduvi e malati

puri "putenti" facisti canziari!

Nica com'eri cu putia pinzari

cavissí forza di na liunissa,

ca mancu la natura potti fari

la prova di pigghiariti pi fissa.

A ottant'anni sì bianca e minuta

e, 'nta la vecchia casa di me patri,

puru si sula stai, c'è cu t'aiuta

e ti pruteggi puru di li latri.

Quannu ti pari avissi a sciddicari

na manu ti susteni cara matri;

spissu ti veni 'ntesta di pinzari

ca ti susteni l'ummra di me patri!