FILO’

 

Tosi e tosate intorno a le fogare

i putini fracà dosso so mare,

el boaro sul strame ch’el ronchisa,

le rumega le vache, pia pianelo

de for la luna la sbianchisa el çielo,

se sente paciolare el vecio Vito.

 

Da casa mia, i sarà sta, no so,

do direti de s-ciopa su par zo.

Sul rio ch’el gen a salti zo da Rua,

ghe jera ‘na casina pizoleta

che la pareva fata par la pua.

E in drento ghe viveva la Nineta,

la vedova del poeo Cacatua.

Una doneta, Dio, de che fatura!

Ciara de muso, i oci sprandolisi,

alta de culo, drita de fegura,

do tete in pieto che fazea s-ciantisi!

La ghessa vista parecià da festa,

la pareva’na nobila spuà !

 

Quel poro ometo par tegnerte testa

el xe morto destruto, consumà !

 

Ben, non fa gnente, ma tornando al fato,

xe pi che naturale, Dio beato,

eche ‘na vedova zovene e piazente

la gaja qualche grijo par la mente.

E mi, tosati, che ghe stava rente,

dal Padrenostro in fin l’Avemaria,

cofà un can drio ‘na cagna incaloria

ghe anava sempre intorno; ben s’intende

ghe jutava un fiatin te le fazende

a menar acqua, a solfarar la vegna,

a sterpar dal formento la gramegna.

 

Do volte o tri fa un paciolesso e l’altro

go tentà de sbrissare for de via;

un par de volte, po', go slongà scaltro

‘na man zo par el col, i mezadria,

( carcandoghe el nizolo de forajo

fea finta de falarne col zavajo).

E ogni volta, par dir la verità,

la dona el culo in drio la gà tirà.

Ma ogni dona, Dio, quante la gh’en fa

par figurire ingenua e respetà !

 

‘Na sera jero drio pelar la foja

qualmentre ch’ela pascolea la roja.

Me go fato corajo e lì, par Dio,

go dito s-ceto: Vu gavi capio,

cara Nineta, no tireve in drio,

go ‘l morbin ‘n te le vene fa un puliero,

molè qualcossa, se no al çimitero

ve fazzo anare drita fa el direto.

La ga risposto un no cussì moleto

ch’el ghea l’aria de un s-ceto e spuà.

 

No go voja de ati, la ga dito,

son vedova onorata e respetà.

Mi ve repeto ch’el compare Vito

el ga ‘l sangue che boje in drento al core;

molè qualcossa, su,beleza, amore;

co ‘l campanil de Rua bate le nove

feve catar in teza, anca se piove.

E va ben, la ga dito, par le nove!

 

Contento mi, tosati,figureve,

gavea drento un mestiero fa la freve.

Me go slontanà zo par la pontara

e come un pulzinelo co la snara

gheva ‘l fià curto, el sague in terremoto,

la pissarola, l’orboe, e ‘l cagoto!

 

Ma intanto, sta rufiana, buzarona,

le core oltra fin da la me dona

e par filo e par segno la ghe conta

el me discorso, sta ptana onta.

 

E fra de lore, cossa le combina?

Le so acorda cussì: che par le nove,

de sora in teza al posto de la Nina

ghe va la dona mia, anca se piove.

 

Le nove le s-ciochea sul campanile

che mi postea la scala sul fienile.

Pi sguelto de un sitòn, so sta de sora,

ma gheva el core che ‘l saltava fora.

Nina – go dito, Nina, so rivà:

e ‘na vozeta la me fa: qua, qua.

Che scuro malendreto, Maria mia,

me scapea de tirar qualche resia?

Finalmente a laorando de palponi

ghe go batudo in coste, sui galoni.

 

Ormai, credime a mi, jero sidià

e suito… le manobre go tacà !

‘Na man de qua, ‘na man soto par là,

beh, insoma le manobre che se fa.

Na roba asguelta, senza comprimenti,

se no, putei, s-ciopava

E finamentre, sul pì bel de l’ato,

me scapa dito: Anzolo beato!

Ti te laori ben, ti te ghe razza,

altro che la me dona despossente!

 

E mi chi sonti, fiol de ‘na trojazza,

putaniero, imbeçile, dilinquente,

- la taca sberegare fa un ossesso -

sgrugno de mas-cio, aretico, fetente

rufian, luamaro, verminoso, cesso!

 

E forte che la jera, la me dona

fra do fregne de fen la me incantona,

la se cava i zopei, senza pì arfiare

e pache – la putana de so mare -

e pache la me dava sul zucol

e, po', co ‘na pelà, tuta de un zolo

la scala me go fato in fin su l’ara.

 

El can de casa el taca ‘na cagnara,

le oche le scominzia a starnazzare

e la femena drio, vaca so mare,

e pache coi zopei sui sentimenti,

che ormai vegna imbeçile, santamenti.

Par tera me go trato desparà:

ca ‘na paca sul fruto la m’a alzà!

 

Cinquant’anni, putei, xe za passà!

 

Ride omini, done e fin le vache,

qualcun cogna che ‘l mola le tirache!

Le bronze intanto pian pianin se stua,

qualmente el campanil del monte Rua

el poza in gropa a un fià de venteselo

dòdese boti che se perde in çielo!

 

 

( tratto da “Par pèrdase via� di

Pier Giuseppe Cévese, 1914/1995)