Quantu ricordi, quanta nustargia!
Ad ogni arvulu e ad ogni passu ci aiu na storia
ca mi porta n’arrietu cu la memoria:

stori di prieiu e di siddìu, di prugetti e di spiranzi
consumati cu Maria,
ca fu lu chiuvu di la me picciuttanza
e ora cumpagna ‘na la vita mia.

Pino Minnuto
__________________________

nr. d'ordine 6

L'aria di lu me' paisi

Mi piaci l'aria di lu mè paisi,
ca è frisca e prufumata di ginestra;
mi piaci lu culùri di li casi,
c'ammustranu li grasti a la finestra!

Mi piaci caminari pi li strati
sìanu pinnini e sìanu muntati,
sìanu 'ncuticchiati o abbalatàti,
cunsunti di lu tiempu o ammudirnati!

Mi piàcinu li vuci di li mastri,
li ficu ad'asciucàri 'nta li gghistri,
di li muntagni li macchi d' alastri,
e li troffi aggiuvittati di l'agghiastri!

Mi piaci chiacchiàriari c'un scarparu,
lu suonu di la 'ncunia d'un firraru,
lu sciàvuru di pani d'un furnaru,
lu lientu cantu di lu picuraru!

Mi piàcinu li tetti di li casi,
li vicchiarieddi chi filanu li fusi,
lu sciàvuru di 'ncienzu di li chiesi,
mi piaci l'aria di lu mè paisi!

Cirinè (Italo Runfola)
__________________________

nr. d'ordine 7

Lu me' paisi

Tutti adornati di gelsominu e rosi,
su’ li balcuna di lu me’ paisi,
‘nta ddi vaneddi stritti e profumati
di cosi duci, o di cosi cucinati.

Ogni ddu’ passi cceni ‘nu scaluni,
‘cchianati e scinnuti senza fini,
la genti anziana sta ‘nta li so’ casi
e nesci sulu ppi fari la spisa.

Quannu ci vaju mi sentu a me’ casa
cu mi canusci m’abbrazza e mi vasa,
sannu cu sugnu, cuè la me’ famigghia,
comu mi chiamu e di cu sugnu figghia.

Però, quannu talìu ddi porti chiusi,
mi mori ‘u cori, mi parunu pietusi,
si nni su ghiuti tutti, ad unu ad unu,
d’intra a ddi casi non c’è cchiù nessunu.

E dda casuzza mia nica e fistusa,
‘ristau abbannunata e pietusa,
muta tant’anni, la so’ porta chiusa
taliu di fora, ma d’intra non ci trasu!
Pienzu, ca c’era misu ‘nto ‘ncantiddu,
ppi’ l’acqua frisca, ‘nu beddu bummuliddu.

Supra ‘a finestra a gaggia co’ cardiddu,
tutti i matini n’arrisbigghiava iddu.
Ora su’ ddà, lassati abbannunati,
chiusi a lu scuru, senza cchiù circati!
Iu li lassai! La me vita ora è ccà,
ma lu me cori è ppi’ sempri ddà!

Tina Barbirotto
__________________________


nr. d'ordine 8

O Bedda Matri c'a lu munti siti

O Bedda Matri c'a lu munti siti
di lu bieddu paisi di Lalia,
fattu di strati tutti in pinnenza,
di Maccarruni a la Funtanedda,
ca quannu la genti nesci di dintra,
milli voti, a Vui si raccumanna,
e quannu Diu rapi li catarratti
e li stratuzzi vadduna addivèntanu
allura siti, pì nui Navicella
et Marìs Stella fulgidissima,
e cu voli grazzi e a Vui nun ricurri,
sua desianza vuol volar sanz' ali...

Quannu talìu la to 'facci amurusa,
mentri c'addatti a lu Bamminieddu,
ia sbuttu a chianciri di commozzioni
e, nni lu stessu tiempu, di duluri,
picchì pienzu a mè matri Carmela,
c 'assà mi manca, e puru a lu munti,
nna Matri c' è chi ghinchi li mancanzi
e 'u mi fa sentiri orfanu e sulu,
ca, cu li fìgghi di me ' pà e mè mà,
cci su ' li frati e suoru di lu munnu
ca ricanùscinu a Vui pi Matri.

Tu sì Matri di tutti e Mammàna,
picchì, si 'n 'Alisi veni a lu munnu,
a Marcatubiancu, Mèlton, Marrèro,
"Maria!", ti chiamanu, "di Li Grazzi",
"Maria, ven'a dunacci 'na manu!... ".
Bedda a lu munti, bedda in pricissioni,
lu dù di Lugliu di tutti l'anni,
pi omnia saecula saeculorum...

Bedda cu lu mantu e senza mantu,
bedda a Staten Island e a Tickfaw,
unni l'alisi c' all'Alia nun viennu,
Maria di Li Grazzi, ogn 'annu, acclàmanu,

Didacus
_______________________