Quagghiata at Midnight...

O zammataru di Manniranova,

d'unni ti vinni sta cosa geniali

di quagghiari, la Notti di Natali,

nna lu Bagghiu di lu Cavalieri,

a la nisciuta di li fedeli

di la Nascita di lu Bamminieddu ?!...

Chi quagghiu cci mittisti, pi quagghiari?

Quagghiu d'agnidduzzu o di crapettu?

O quagghiu di sciuri di quagghialatti,

senza sacrificiu di nnuccenti?!...

A la quagghiata, nni la tinozza,

un signu di Cruci cci facisti,

cu la santa ruotula di lignu,

chi fa parti di lu to' repertoriu

di stritta pertinenza pastorali…

Atturniatu di nichi e di granni,

di curaggiu, tu cratulu, nn'avisti…

Cu acqua caura, cchiù chi pungenti,

lu bagnu a la quagghiata cci facisti,

e tuccannu e strinciennu cu li manu,

la quagghiata in tuma trasformasti,

chi, cu delicatezza, tu pigghiasti,

nna lu tavulieri, tu, mittisti,

e cu li ita lu sciazzu cci facisti,

nni la fascedda di iuncu veraci…

Cu la lacciata, nni la gran quarara

e la quarara supra la furnaca,

un pugniddu di sali ed autru latti,

fuocu di sarmenta e d'erva bianca,

tu, n'autra meravigghia priparasti…

Amicu mia, dimmillu, si c'è bis,

e dimmi puru chi agru cci mittisti,

quannu, muviennu, cu grazzia, lu zubbu,

di ràdica di masticogna, e dritta

bacchetta di lignu di miènnula,

tu sentisti ch'era iuntu lu tiempu!

Latti di ticchiara o sali inglisi,

sieru àcitu o acitu catusu?!...

O propia, agru, tu nun cci mittisti,

sicuru cuomu si' di li to' minni?!...

Chi cazza usasti, di ramu o di zincu,

pi cogghiri lu sciuri di lacciata?!...

E pigghiu abbagghiu, si lu bagghiu chinu,

nun fici scrusciu fin'a lu matinu?!…

Didacus
_____________________________

Hiperglycaemic Autumnal Equinox

Ducizza di stasciuni, st'autunnu,

di li fimmini àvi l'incantìsimu,

lu ruffianisimu di li carusi…

Ti duna piaciri senza funnu,

di senzazzioni smaniusu sanzali…

Nun c'è buttanata ca nun sapi,

cu li cristiani gran traggediaturi…

Di robbi luordi, nn'àvi quattru trusci,

di bona qualità, già 'nsapunati;

lu sceccu è prontu pi la Brivatura…

Ducizza di stasciuni nna li kaki,

nni l'anzòli, lu mustu e vinu cuottu,

ca di profumu ti inchi li naschi

e pi' la ucca 'un c'è cosa cchiù duci…

Nni li ficurini e li mustardi,

ficu grattalori e nat…alisi…

Nni li nuci, nuciddi e fastùchi,

muluna russi, bianchi, virdi e gialli,

sarsa di buttigghi e arti astratta,

pumadoru appizzatu a lu tettu…

Di l'ultimu fruttu di l'estati,

quannu viriti niespuli, chianciti,

di sorvi , passuluna, maiddati…

Cucuzzi di mmiernu, gialli e aranciuni,

pittati, criu, da nostru Signuri,

senza punzieddu e senza culuri…

Nna li gistri di ficu ad asciucari

e li crivati di miennuli e nuci,

e puru ca lu duci nun ti manca,

ti manci un vurciddatu e nna scattata…

Ia, ringrazziannu a Diu, mi cuociu tuttu

nni sta pignata di crita…affumata,

a fuocu lientu e cu lu bieddu tiempu,

cuomu carni di piecura a stufatu…

Didacus
_____________________________

On August Saracin Muffura Flash back

Austu, riustu, capu di mmiernu...

Ma d'unni vinni sta muffurata,

c'àvi di nna Maiu ca 'un si nni viri,

ca si prima avissi saputu,

ramu e stagnu 'un cci avissi appizzatu?!…

È negghia tirrana o fumulizzu?

Scinni di li parti di lu Pizzu,

la varva vagna garibaldina,

vagna li vigni cardinalizzi,

curiusa s'è ammazzata la racina;

minna di vacca, niuru pirricuni,

nzolia, zibbibbu, catarrattu…

Mentri parramu è già a Li Casuzzi,

Surfara, Fùnnacu, Cientuvintunu,

Càvaru, Sclafani, Caltavuturu,

Sciarrìa, Tumarranu, Cammarata...

O muffurata, sparagna li vigni,

li troffi e li cuocci di pummaramuri,

di tigni, farinedda e peronòspera,

ca li duttura nni parranu beni

e fannu tutti la scuma a la ucca,

for love intercourses e cosi d'amuri,

thanks to action of lycopene...

Didacus
____________________________

nr. d'ordine 4

An October cree cree night

Na luna ca cci sientinu sculanti,

duna li spaddi a lu fuocu ardenti

di la granni brascera d'Occidenti…

La sira è arienti, saprita, 'nvitanti

pi' l'aridduzzi di Santu Giuvanni,

ca lu cri cri di sempri accuminciaru

ancora prima chi facissi scuru…

Cchiù chi Ottobbri mi pari Giugnu

cchiù chi autunnu, stasciuni mi pari,

cuomu quannu durmìamu nna l'arii

cu pagghiarizzi pi matarazza,

visazzi e visazzuotti pi linzola

e pi coperta c'era la trapunta

d'un cielu tuttu sona e tuttu luci…

Ddu 'nsistusu cri cri, senza paci,

di forza ti trasìa nni l'aricchiuzzi,

tuccava lu funnu di li curuzzi

e avìa 'na parti nna li nostri suonni

di carusi chi cridìanu a li nanni

quannu ti dìcìano: Propia cca 'n facci,

a menzannotti, l'uocchi svavalùciati,

ca viri la Fera di Barbarà !...

Didacus
_____________________________

February Fever

Iadduzzu canta, iaddina carcarìa,

e, finalmenti, aviemu ccà a Frivaru…

Frivaru, Frivarieddu, Frivaluoru,

tinta iaddina ti fa lu so' uovu...

Pi Cannilora…l'armusci su' fora...

e pi San Brasi la mmerna cci trasi…

a lu viddanu chi è a la campìa…

Pi lu burgisi chi è a lu paisi…

cci su' cannaruzzieddi e vinu cuottu,

nni la tavulata di San Brasi...

e, duoppu Sacra Veglia e Quarant'uri

e "Me' Signuri, cu c'è cuom'a Vui?!...",

nna li ratori e nna li saristìi,

cci sunnu catalani e taitù,

anghi di muortu e miennuli caliati,

da Santu Rasoliu ristorati…

Ma c'è a cu cci piaci assà di svariàrisi

e 'na stricata si la voli fari

lu iuornu di lu Iuòvi di cummari,

lu Iuòvi grassu, iuovi lardaluoru,

e li duminichi di Carnilivari…

e la iurnata di lu picuraru...

Didacus
_____________________________

St Lucy Suspense... with Cuccìa

Li iurnati già iavanu a l'accurzu

e quannu si turnava di la scola,

eri cuomu 'na petra nna un puzzu…

Li matinati, na' scupittata:

scuru, ilati, furturi, nivati,

quannu me' nonna: Ghinuzzu, Ghinuzzu,

viri ca sona abbu di missa,

e tra abbu e introibbu picca passa...

Me matri mi cuntava ca, carusa,

di lu liettu li Cristiani sdirrubbàvanu

li Tridicini di Patri Firruni,

di scialli e cappuotti Matrici inchìanu,

picchì squasava cu la so' favella,

e fora fuchiàvanu li picciuttazzi,

aspittannu la fini di la missa...

Siemu a li tiempi di Dioclezianu

ca li Cristiani, pi diri: "Jesus !",

li cinturiuna di la Tetrarchia

"sine pietate eos torturàbant…"…

Chi fini fici la bedda Lucìa,

'n manu la parma di lu martìriu,

nni l'autra manu, lu piattu cu ll' uocchi!...

Quali furmientu, quali cuccia!...

Cu sali e uogghiu, o è liccumìa,

cci po' scappari sulu quarchi cìciru…

"La Santa Vergini Siragusana

s'avìa prumisu a Lu Sposu Fidili,

e la so' fidi nun putìa tradiri…"…

E c'è cu ancora annetta la cuccìa!

Didacus
_____________________________

Urfa Caves

Historical ALIA's country,

Urfa by Arabians called,

because of beautiful caves

in hard sandstone excavated…

Feracious, wonderful, country…

Prodigious, Caves' frontage,

facing the South of Sicily…

Sicanians, Aegeans, Greeks,

Phoenicians, Latins, Arabians,

lodged at Urfa's Caves…

Graperies', grain's, corn's,

Green olive's trees'

Urfa fuerunt queen ….

In medium of the winter,

in flower, almond trees

and white snow's leaves…

Didacus
_____________________________