nr. d'ordine 1

American Di…Vine Impupata

My father was born at Raccourci,

Pointe Coupée, Fausse Rivière,

not near Paris, not near Palerme,

Louisiana, States, Morganza, Parish,

along the flow of Mississippi…

Innis, Batchelor, close, pretty, towns,

New Roads, Morganza, Baton Rouge,

all in the mind of my grand mother,

in her heart, in her mouth,

with loved name of her mother…

My father was baptized at Raccourci,

Bayou, Plantations, Mississippi,

Church, OurLady of Seven Dolours,

unholy felled, in nineteen forty,

for making way to Spillway;

a Dolour more for Our Lady…

My father was born at Raccourci,

He was baptized at Raccourci,

with holy water of Mississippi…

Vinni lu tiempu ca Geniu impupava,

Cu disa, liama, ampelodesimu

cuomu lu chiamanu puru a Palermu,

accussì cuomu, Ámpelos, chiamanu,

bieddu picciuottu di stirpe divina,

la vigna chi dà sucu a la racina,

ca, p' iddu, Diònisu, fici pazzii…

Vinni lu tiempu ca Geniu abbrazzava

cchiù di un migghiaru di vigni a li Timpi,

cu' 'nzoli, vernaccia, catarrattu,

muscatieddu e minna di vacca,

ca pi l'amata Rosa riservava,

e cu li viti la polka abballava,

cu suli tri fila d'ampelodesimu,

ca voli diri cintura di Ámpelos

E di lu sballu, nna lu cchiù bellu,

la vita, a la viti, cci cincia,

e p'essiri sicuru ch'era sua,

tri giri a destra e quattro a sinistra,

un bieddu catinazzu cci facìa…

Vinni lu tiempu ca Geniu pigghiava

liama, disa o ampelodesimu,

di lu pagghiaru, beside the vine,

cassu di rina, carpa di canni,

taddi di zabbara, cirauna,

e un migghiaru di viti si facìa…

Didacus
__________________________

nr. d'ordine 2

Ius uschiandi

José Carrillo, cu sti bieddi vigni

di cirrinciuolu, 'nsolii, curtisi,

mi fa' uschiari duoppu li vinnigni,

senza paura di corti d'assisi?!...

Matinata di mienzu Ottobbri

Smovi lu vinticieddu la grassura

e di luntanu ti la fa sniffari…

Sapissi cuomu è misa l'acquazzina

supra la vinnignata santa vigna,

e un suli, forti, p'èssiri matina

e p'éssiri d'ottobbri a menza strata

si prèia cu li ucci di rusata

di li pampinuna di li viti,

e un sulu suli tanti suli pari...

Didacus
__________________________

nr. d'ordine 3

" Ad incensum lucernae "

(No Electric Prudentius' Times)

Dominiddìu, ca facisti lu munnu

e lu tiempu spartisti, cu gran siennu,

codda lu suli e nni mori lu cori,

nni tremanu li canneddi di li iammi.

O Signiruzzu, 'na stizza di luci!

Puru, di picuraru, canniledda…

Ma tu la luci a La Luci addumanni?!…

E' comu si 'na granni brascirata

fussi priva di luci e di caluri…

Talìa nna lu cielu, a 'n'autr'anticchia,

ca è tuttu di stiddi 'na trapunta,

cu la luna addumata, a quarchi banna,

a palla, a barcarola, sculanti…

E si propia c'è scuru ca si fedda,

lu Signuri nn'insigna a fari fuocu,

o cu la ferra o cu la silici,

unni sfricannu, unni battiennu,

pi' fari figghiari la faidda…

Accussì nni la stanzia ci addumamu

la lampicedda ad uogghiu a ll'Armi Santi,

e nni putièmu taliàri nni la facci…

Cristu, vosi essiri, la vera petra,

chi duna a la terra luci e caluri…

Beata, dda casa, ch'è a facci di suli!...

Didacus
__________________________

nr. d'ordine 4

Facci di brunzu!

Facci di brunzu so' pa' lu chiamava

e nun putìa capìri picchì…

Forsi, pinzava, picchì nna li studi,

truòppica, è surdu a li puntùri…

Fin'a quannu, un gnuornu d'estati,

mentri so patri nni mia murritiava,

Facci di brunzu arriva in vispinu,

nna lu menziuornu, cuomu un vispisinu…

"C'è Facci di brunzu" mi dici so' pa'!...

E allura pienzu ch'è la vota bona

pi taliallu pulitu nni la facci;

e, accussì infini mi fici scienti

picchì a so' pa' di brunzu cci parìa…

Puru a mia di brunzu mi parsi

dda facci, cchiù di brunzu chi mai…

Autri nn'aiu vistu ca su' òpiri d'arti,

nna li vari musei di l'Occidenti,

cuomu l'Efèbu di Silinunti,

di Mazzàra, Lu Satiru danzanti,

ma Facci di brunzu cchiù bieddu mi parsi...

Didacus
__________________________

nr. d'ordine 5

Saint Ann's Nenia de Niño

Tu ca la Nonna si' di lu Bamminu,

di la Madonna la Matri Sant'Anna

e di Iachinu dulcissima manna,

nna lu Vangelu di tìa 'un si nni parra,

tranni nna chiddu, apòcrifu, di Iàpicu.

Ma ia ti sientu c'annachi a l'Addìa,

dannu 'na manu a dda Figghiuzza-Mamma,

mentri Giuseppi si scutta lu tuozzu,

nni la putìa cu chiova e cu chianuozzu.

Ti sientu mentri canti a lu Carusu,

chi sta agguacciatu a lu to' cori granni

d'Ebbrea c'àvi tantu di cuntari..

"Duormi, Niputi, duormi, ch' è Natali

e 'un sacciu ancora chi t'à' regalari,

forsi un cammellu, forsi 'na pila,

pi' mètticci li pisci di lu mari,

'na crapa niura chi fa latti biancu,

un pisci vivu di lu Mari Muortu,

'n'ancidda d'oru di lu Sciumi Tuortu,

'na baccaredda di Vaccu e Vaccuottu,

un bummarieddu di la Zza Marìa …".

Gesuzzu àvi l'uocchi a pampinedda,

ma nun s'arrenni a la Matri Sant 'Anna,

e, cuomu Criaturi e Criatura,

scaccanìa a li truvati di la Nanna,

e penza già ca la so' Cruci è granni…

"Duormi, Niputi, duormi, ch'è Natali

e la Nanna àvi autru da fari;

quattro viscotta vol'incuddariari…

Didacus
__________________________

nr. d'ordine 6

Still in time for ...sister frittedda

" San Paulu, turrenu, ancora cauru… "

e Paulu di Tarsu ti simìna

la bedda frittedda paulina,

ca duoppu parti e prima t'arriva,

rispiettu a li simienti chi simina

nna li misi agr'e duci di la sìmina.

Duoppu ti parti e prima t'arriva,

picchì, mentri, pi chista, fors'abbàstanu

tri misi e mmienzu o quattru, pi cùnchiri,

chidda sei misi tutti si li pigghia…

Tantu , ca a'n'autr'anticchia, cu simìna

scusati, genti, la minchiunerìa,

po' siminari frittedda e nuccinticchi…

Didacus
__________________________

nr. d'ordine 7

Uòcchiu a Santa Muònica!

Ia nun cci sugnu, ssa talìa vassìa ,

Li matinati di Santa Muònica…

Si la memoria nun mi cugghiunìa,

sunnu l'unu, lu dui, lu tri d'Austu…

Si, a lu matinu, c'èni l'acquazzina

e lu cani, la cura, 'ncuddarìa,

lu vientu, cu li fogghi, murritìa,

aviemu 'n'annata di malu chiddìri

e aviemu tiempu d'arriminari,

brasceri e pignatati di pitirri…

S'è asciuttu lu tiempu, pi tri matini,

e a lu cani cci spercia di bbabbiari,

e, iuculanu, la cura annaculìa,

l'annata sarà asciutta e senza gelu…

E sulu di nivi 'na pampiniata,

pi' ralligrari lu Bamminieddu,

e lampi e trona pi l'Annu Nuovu…

A ssa si susi e si li talìa…

Li matinati di Santa Muònica…

E a che susùtu, ssa va' pi li cieusi,

prima ca l'arduri di lu suli,

cu li so' rai, li corna cci quarìa,

a crapi e vuòi…e, nna li trazzeri,

sulleva pruvulazzu cu camina…

Didacus
__________________________

nr. d'ordine 8

"This is for lovers running away..."

Quannu codda lu suli a Malascarpa,

sona l'Avirmarìa, canta la cucca,

e, la sira, quannu unu si v'a curca,

nient'autru si senti nni dda rocca:

cantu d'acieddi e lamientu di cucca...

Chistu canta l'anonimu poeta,

s'è piru alisi o piru sclafanìtu,

nun cci miettu la manu nna lu fuòcu,

e siccomu truvari 'un è possibbili,

autri versi di stu picuraru

c'avìa la testa pi' la poesìa

cuomu pi' tingiri Giottu la manu,

puru si li risorsi sunnu scarsi

e la me' vampicedda un po' stintata,

e sacciu puru lu proverbiu anticu:

Quannu lu nicu si metti cu lu granni,

a mala banna li viertuli appenni,

vulissi tintari la granni 'mprisa

d'allungari lu sucu 'n'autr'anticchia,

cuomu lu poeta Macpherson,

ca fici a crìdiri a ddi 'nfarittati

di l'uòmini chi ballanu lu Scottish,

lu Fox-trot e la Country dance,

ca li so' versi eranu di Ossian,

pop canturi di tila medievali…

Quannu codda lu suli a Malascarpa,

sona l'Avirmaria, canta la cucca,

e, la sira, quannu unu si v'a curca…

Propia 'un mi sientu e l'arma 'un m'abbasta

di calaricci ancora qualchi filu

nni st'acqua ugghienti di poesia,

ma mi rassegnu picchì sunnu versi,

nun su' spaghetti o mienzicasuddi…

Forsi sti cincu' versi, 'n cumplitizza,

vàlinu tutta l'òpera di Meli,

accussì cuòmu in Dimmi, dimmi, apuzza…

c'è tuttu lu meli di la vrisca…

Didacus
__________________________