Siritina di mmiernu…

e a li iatti cci arzianu li pieri…

Arrimina lu luci La Gran Matri,

nni la paletta c'impinci la cìnniri

pi' la forti tassura di la sira.

Scappa 'na faidda di la braci

e 'n'arma 'n Paradisu si la fila…

La turtura fà tùr, tùr… nni la so' iargia,

si smovi lu sceccu nni la stadda.

'Nguè 'nguè…fà Gisuzzu pi' la minna.

Maria, ddà banna, bada pi' Giuseppi.

Fora, lu vientu canta ninna nanna…

Didacus
__________________________

St Rosaly Square

(To Mr.Enrico,Webmaster)

Saint Rosaly Square

from where you went

by a little coach

for a Train Station

whose name is a rock

and a dove on the top,

in the middle of season

of blooms and odours...

Uncle Nick came back

after years and years

and a lot of cups

won in Ju, Es, Ei...

Puru tu ti nni isti,

without giving news

for a thousand of full

and yellow moons...

And not very soon

you reappeared again

for the joy of friends

by the 3 doubleiù's

and by Arca onlùs.

Didacus
__________________________

Natali cu lu suli...

O d'unni niscì sta bella iurnata,

fatta pi respirari aria pura

e starisinni un poco a lu suli,

tantu ca pari Pasqua e no Natali?!...

Nun certu di La Grutta di lu monacu

e mancu di Li Grutti di la Urfa,

pròspiru fièudu, di bedda memoria,

unni l'anticu dici c'a li tiempi...,

tubbiuna si sintìanu tubbiari,

zappuna si sintìanu ammarruggiari

e scimitarri si virìanu archiari

ed anchi e crozzi s'arrizzulàvanu...

Di nni la Grutta di Betlemme,

unni nascì lu nostru Ridinturi,

ia dicu ca niscì lu granni arduri,

la luci e lu suli di Stu Iuornu.

Didacus
__________________________

Christmas express mail @

Lu sceccu arragghia,

abbaragghia e ti cerca

coinquilinu di la me' cuntrata,

non chidda nobbili di Villa Tasca,

ma unni s'àprinu li infiorescenzi,

sciacquati e tunni, cuomu luna china,

di Li Saùchi, ni dda stasciunata

ca Dominiddìu fici lu munnu,

e li cardiddi ci fannu li nira.

Lu sceccu t'arragghia ogni quartu d'ura,

può sincronizzari lu to ' roggiu,

tutta la zona suttana di Sauchi

po' sèntiri puru lu so' cantu...

Ni Giacomino, at Charlie Chaplin 's,

si cucina e si servi lu clienti

secunnu li cadenzi di stu sound,

ma tutti l'abbitanti di la zona

sunnu gilusi di la gran furtuna

di li villi chi sunnu randi randi,

picchì oltri a lu cantu chiù sonoru

di lu sceccu c'arragghia e fa pupù,

puonnu registrari, ni lu sfuorzu,

intercalatu, ex abundantia cordis,

tantu apprizzatu di la high-society,

picchi di n 'armalu in estinzioni,

a modu d'intermezzu... qualchi truonu...

Ma nun ti scuraggiari, caru frati,

ca si' 'n Palermo e nun ni può fruìri,

picchi lu sa' chi fazzu, 'n tiempu 'u nenti,

vistu ca di la chance paghi l 'utenza?...

Ja t'organizzu, in menu d'un nenti,

cu' stu jackàss di razza di John Wind,

o ni na hall o a turrenu niettu,

na bella conferenza in Intenèt..

Didacus
__________________________

Chiossà penni, chiossà renni!..

Prima di cògghila, àv'ammunacari!...

Cci dissi Pinu, nna un so' 'ntercalàri;

-E a ssa gnimmìsa cos'è st'autra cosa,

spintozza, trùvula, indigna di pinna:

- Chiossà cci penni, chiossà cci renni!..

Didacus
__________________________

Cats in love

Vinni lu tiempu ca si nni fùinu

iatti e ghiattuna nna li cantuneri,

sauti murtali e grida strazzianti,

accussì dulurusi, nni la notti...

Vinni lu tiempu ca, misi a lu luci,

sintìamu sti gran vuci di duluri,

e a li nostri nanni addumannàvamu

picchì stu chiantu accussì lamintusu,

cuomu di nnuccintuzzi a li sevizzi,

e l'anziani ti dicìanu, cu pudùri,

nna cosa giusta e nna farfantarìa

quannu, iennu a l'accurzu, arrispunnìanu

ca a li iatti ci arziàvanu li pièri.

Ca c'era l'arzìu, sì, era veru,

ma 'un era veru ca a dd'armaluzzi,

ca ittavanu vuci di murìri,

Voci alte e fioche, mastru Danti dissi,

mastru, picchì scrittu a la maistranza

di li miedici e di li spizziali,

eranu li pieri chi cci arziàvanu…

Didacus
__________________________

Marcatubiancu, dda banna la rivèra…

C'è un puostu, dda banna la rivèra,

ca c'è lu veru sciuri di la genti,

ca su' di lu villaggiu provenienti,

ca, nna ll'arii, cu pisa l'anninga,

si a Cristu 'n Cruci si raccumanna,

e… la terza Duminica di Maiu,

pi la Festa di Marcatubiancu…

L'Alisi, dunca', di New Orleans,

c'a frotti vìnniru di l'Atlanticu

tutti li voti ca lu transatlànticu,

ad Ellis Island calàu l'àncora,

quannu nun vìnniru, direct way,

cuntari nun puozzu tutti li guai,

Marrero chiàmanu Marcatobianco,

nni l'autra riva di la rivèra,

e l'abitanti Marcatubiancara…

Didacus
__________________________

Cantu di lu picuraru a la campìa...

(a rich Mediterranean diet)

puru lu re, lu pupu e lu nanu…

C'era 'na vota un re, un pupu e un nanu…

Cu l'agghia e l'uogghiu e 'na bona saliata,

a mmia mi piaci puru squarata,

ma lu formaggiu nun cci pò mancari;

e puru mi pari ca pasta e caciu

è cuomu diri Cosma e Damianu.

Mi piaci a bruoru e a ministruni,

cu lu sughettu di lu caprettu

e lu culuri di la zafarana,

ma lu saliatu nun cci po' mancari..

E si mi spìi qual è la regina

di la pasta di casa di 'na vota,

ia t'arrispunnu, senza esitari:

"Cavatieddi cu sucu di maiali…".

Pua c'è lu crastu addivatu cu favi,

e, si ti allicca, carnazza di piecura,

ma, picurinu o cascavaddu,

un pugnu di caciu 'un cci àv'a mancari…

Didacus
__________________________

Cara Beatrici,

ora c'a li bbabbà la grazia cci carì

e luna criscenti cunforta l'amanti

cu tìa , cara Bici, mi nni jssi,

a vavalucieddi, a Rearmici…

Nun troppu prestu, ma versu li deci,

no, a la piduna, ma in bici beci,

accussì li livamu di ddu 'Nfiernu

di masticogni e di panicauru…

Ma prima di purtarli in Paradisu,

nna lu Purgatoriu ànn'a purgari,

per lo menu pi' ventiquattr'uri,

ca su' nnenti 'n confrontu a li tiempi

assignati a l'armuzzi purganti,

nni la nostra Commedia Ambulanti,

scritta da lu Coscrittu Spasimanti,

Dantuzzu Alighieri, sottoscrittu.

Didacus
__________________________

Aliaelectionday, may 2007

(Anonymous London bells parody)

Little the town, large the ditch,

ring the bells, at Matrici.

The green is green, the tan is tan,

ring the bells at Sant'Anna...

We are glad, we are happy,

ring the bells, a San Giuseppi...

Surely, you know, ia nun lu sàcciu,

bells are rung at Rosaly Church …

Fifteen women are craving for you,

ring the bells, at Cravaniu...

A Melton, pumpkins, ad Alia, cucuzzi,

ring the bells a Li Santuzzi…

Ddà sunnu beautiful, ccà sunnu bieddi,

ring the bells, a Chianchiteddi…

Didacus
__________________________

Sciarrìa tango

nni la trazzera, cuom'a l'autra sira,

Stasira, amuri mia, cu mmia ti vuogghiu,

tra frischi fraschi e cuda cavallina…

Ti prego, amore mio, di non mancare!…

- Cuomu puozzu nun vèniri, sciacquatu,

tra frischi fraschi e peri d'aliva,

tra surchi sdati e chini mutàngari,

nni lu vadduni ca di la Sciarrìa

parti e, scinniennu pi' Coscascinu,

Muntagna e Passu di lu Bamminu,

Vaccu, Vaccuottu, Mulinu di Lànnaru,

t' arriva a la sciumara di lu Tuortu…

Didacus
__________________________

Alba pratalia

un pocu di cultura l'àv'a aviri:

un c'è bisuognu ca ci n'àvi assài,

ma tantu quantu basta pi' sapìri

cu' ènì Danti e cu' Pietro Fudduni…

La punta di la littra 'un guasta mai…

o duni di mazza o ammuogghi la pinna

ni la carraffina cu' l'inchiostro

di la pregiata ditta Watermàn…

Tantu ca c'è un poeta popolari,

un quartu alisi e tri calamignaru,

ca, ni na sciarada assai sistiata,

crea un parallellismu culturali

tra cu' simìna e cu' teni la pinna.

"Bianca muntagna, niura simenza,

l' omu chi la fa sempri la penza…"

Figghiu liggittimu di stessa matri,

c'è, pua, l' "indovinello Veronese",

'na li libbra di storia letteraria,

ca in un disticu, antìcchia, ipermètricu,

rispettu a lu nuostro endecasillabbu,

dici la stessa cosa, all'ultimata:

"Parèba boves, alba pratalia aràba, ...".

"Lu sensu è trùbbulu, comu lu vinu,

ma 'lustri intèrpriti di bella littra

vìrinu chiaru lu parallellismu

tra lu viddanu chi ara la terra,

appizza l' òmmara, spingi li vuòi

e jetta la simenza na li surchi,

e lu scrivanu, cu' 'n manu la pinna,

Didacus
__________________________

L'amuri 'un è bruoru di ciciri!...

E' l'amuri chi lu pumu fa liari,

fa calari lu latti nni la minna,

fa quagghiari lu cìu di la miènnula,

la bedda frittedda fa cùnchiri,

furrania di li puvurieddi…

Chi nni purtà?…", dicìamu a me'nannu,

quannu s'arridducìa di la campìa,

"cutupiddi!…", me' nannu arrispunnìa;

nn'arrispunnìa, me' patri, "cutupiddi",

quannu vinìa di Marcatubiancu,

a ttiempu d'intrallazzu e contrabbannu…

E duoppu sessant'anni, un misi e un gnuornu,

"Chi fruttu è chistu?!…", ancora, m'addumannu.

Didacus
__________________________

The Abba at Alia before "Madonna"

Quannu mina lu vientu di Padania,

ingiustamenti, dittu, Tramuntana,

picchì è vientu chi veni di lu Nord,

di li baldi viddani, suspiratu,

si cu l'arii si trovanu a la via,

vuoi bianculina, vuoi tumminìa,

ia pienzu a Pippinu Garibaldi,

cu li so' Milli, sbarcatu a Marsala,

pi conquistari Trinacria e Calabria

e tuttu lu Regnu di li du' Sicili,

pi cunsignallu, a Vittoriu, a Teano…

Pienzu a Giuseppe Cesare Abba,

tra li cchiù addutturati di li Milli,

ca, cu la cumpagnia di pulintuna

c'a lu magiaru Eber arrinnìanu,

magna cum quietate, all'Alia, scùranu,

tra vintinovi e trenta di Giugnu,

antivigilia di la Madonna,

quannu l'Alisi, cu fauci in pugnu,

di Rearmici, Valati, Cutugnu,

Passu di lupu e di Bamminu,

Zarbu, Culazzu di Coscascinu,

allarga la manu, cci cadi la fauci,

affida li piecuri a lu lupu

e veni all'Alia, pi la musicata,

cuomu lu stessu Cesare notavit,

nni lu so' libbru "Da Quarto al Volturno -

Noterelle di uno dei Mille - "…

"Cesare taccio…", canta Petrarca,

dannu un esempiu di preterizzioni,

pi cu è armatu di buoni intenzioni,

nni li so' bella "Canzone all'Italia",

cincu' seculi prima di l'imprisa…

"Cesare taccio…", vi dici stu pirla,

circa la nota d'un gran patriota,

nni li confronti di li nostri Alisi…

"Galeotto fu il libro e chi lo scrisse",

Donna Francisca a Dante dicissi.

Didacus
__________________________