|
nr.
d'ordine 1
Holy
Aliaeconomy
Tastaiu ‘n’armalu di Li Canciddi,
accussì duci ca parìa di zuccaru
e lu manciari la Cena mi parsi
di nostru Signuri, cu li so’ apuòstuli,
ca ‘un vannu scritti cu la A maiùscola,
picchì c’era Giuda, tra li dùdici…
Panuzzi, lattuchi, pupi di zùccaru,
‘na testa d’agghia, ‘na cosca d’accia,
crastagnidduzzi di pasta reali,
di scola alisa e vaddilurmisa,
e lu vinu nuostru, ridinturi,
ca nni ‘mmriaca di sulu sciàuru,
cu ccu’ lu Cristu cci lavà li pieri
a ddi scausùna di piscatura
e patri parracu li pieri lava,
nna lu sagràtu di lu Santuariu,
si lu Vènniri ‘nn’arriri e nun è lariu,
o a lu riparu di lu du’ ratòri,
primum,Sacramientu e pua Madonna,
a li confrati, nisciuti apuostuli,
cu l’assistenza di mugghieri e figghi,
chi li scarpuna di latu cci tièninu
e lu piecuru in mucca talìanu,
lu mussu pittatu di russu,
non plus ultra of popular arts,
e li quattru punti di li panuzzi,
nni la ‘nguentera chi s’ànn’a purtari,
cu prieiu e firvuri, a la casa…
Lu fici a bruoru, arrustutu, a stufatu,
e, a la finfìni, la carni sapìa
di l’acqua fina chi s’avìa vivutu,
di l’ervi chi l’avìanu foraggiatu,
di la favuzza chi l’avìa civatu…
Vui siti assà curiusi di sapiri
a quali mannira, st’armalu arrenni,
cu, ddu patruni, cu, ddu picuraru,
ca pi’ du’ sordi si nni dispisàu…
In Assarca, commercials nun fazzu,
né pi l’intressu mia, né pi li Chiazzi,
ma, si a li Canciddi, all’acqua iti,
la bedda acqua di la Muntagna,
e l’aria chi sana li malati,
si viriti crasti, addumannati…
Didacus
__________________________
nr.
d'ordine 2
Avimaria
Dal
quaderno di zia Lia Giallombardo,
Ave Maria, dettata da Ciro Leone Cardinale
Cala lenta la sira di lu cielu,
chinu di stiddi e di malinconia,
supra la terra scinni comu un velu,
Sona, sona l’AVIRMARIA.
Chista è l’ura divina, tuttu taci
e la genti ch’è dintra e pi’ la via,
si fa la Cruci e prega in santa paci.
Dio Ti salvi, o Maria, cunsòla l’arma afflitta,
tra tutti crisci la paci e l’armonia
e li famigghi biniditti sìanu…
Di l’orfani e di li poveri la sorti,
o Matri Santa, rienni menu ria...
Ora e nni l’ura di la nostra morti,
prega pi mmia Maria e così ssia...
Didacus
__________________________
nr.
d'ordine 3
Sorry don't mistake
muccuni for mmerna
-Pi Cannilora, l’armusci su’ fora,
-Pi Santu Brasi, la mmerna cci
trasi
Passa Caloriu di lu viuolu,
stimatu villieri di professioni,
niura la varva, ‘nfuta e abbunnanti
da fari ‘mmìria, puru, a un bbrianti
o a lu patri guardianu di la Arcia,
o a lu medesimu, bieddu, San Brasi,
ca è un piccatu ch’è di cartapesta…
-Ssa Binidica, caru prufissuri,
la megghia vita la faciti vui,
ca l’aria vi guditi e la pinsioni...
-Santu e riccu, cantatu confrati,
cu ti cci porta nni sta giummata,
cu lu suli a li novi e tri quarti?!..
Picchì ‘un vieni a trasi, ca ti fa’ la mmerna,
cu du’ cannarozza di San Brasi,
e, supra, cci mietti, ‘n’amaru Averna,
pi nun si diri ca asciuttu fàbbrichi?!…;
Vi ringraziu, amicu mia, amatu,
pròssimu di casa e di cuntrata,
offruti mi fuoru,strabiniditti,
accumpagnati di vinu d’annata,
da li me’ zziani, li Biniditti,
di la tavulata provenienti,
nna lu Santuariu, apparecchiata,
in onuri di lu nostru San Brasi,
trasiennu ‘n chiesa, navata di destra;
la prima nicchia è di lu Santu Vìscuvu,
chidda appriessu, di Santa Lucìa,
l’unu e l’autra, santi specialisti,
Brasi, otorino laringo iatrìa,
in oculistica, Santa Lucìa…
Ma, ancora, c’è puostu, pi cchiù d’un viscuottu,
nni quarchi cripazzu di la me’ panza,
puru s’ ‘un è chidda di San Brasi
ca ‘un si cci viri sutta lu càmmisu…
Nui, di la Matrici, nna li randi,
aviemu cunfidenza cu li santi,
ma, di fidi, nn’aviemu, e nni nn’avanza…
Lu prufissuri si nni sta ‘n campagna
e scancia lu ‘muccuni’ cu la ‘mmerna’!..
Didacus
__________________________
nr.
d'ordine 4
Ab
Aquario...ad Leonem
Ab Aquario...
Sùsisi
nni ‘na fridda matinata
Cu Frati Suli chi s’arrispigghia,
ogni matina sempri cchiù guagghiardu
e dari ‘na manu a lu so’ santu lumi,
ancora luntanu di lu Stiddazzu,
faciennu fuocu cu rami di uscigghiu,
chi ‘ntisiru lu gelu di la notti,
fuocu fumusu, fuocu odurusu,
pi quarchi rama di pignu marìttimu,
calurusu, quann’attassa lu matinu,
pi’ sciogghiri dda patina di brina,
bedda di facci e laria di cori,
chi lassa ‘ntamati li criaturi,
ancora prima di vìrili nàsciri…
...ad Leonem
‘Un
c’è ‘na sima di vientu in
campagna
ed è ferma la trebbia d’ ‘u Signuri…
Li muli, stanchi, si nni stannu all’ùmmira,
duoppu la gran pistata di li gregni…
L’anfura asciuca l’acqua nni la ‘nzira,
Giuseppi pigghia e posa la tradenta…
Pua, pi’ grazia di Ddiu e di la Madonna,
Patruna di ‘na bedda mappa d’arii:
Aria di la cuccagna, Funtanedda,
Puzzu di Mesi, San Giusippuzzu…
Lu Crucifissu di Marcatubiancu,
ca, puru, Iddu, fu misu a la Cruci,
e cci miettu puru a Chiddu di Belici,
ca pi’ nnui, piccatura, morsi in Cruci,
versu vint’uri, si senti sciatuliari,
e prima ca scura è tramontana giusta…
E quannu ‘u marinaiu posa ‘u remu,
picchì lu vientu cci inchi la vela,
Giuseppi ripigghia la tradenta
e Santa Lena l’aria cci spagghia…
Didacus
__________________________
|
nr.
d'ordine 5
Now
that we found Love…
Heavy D., try You Tube
Ora ca veni lu misi di Maiu,
tutti li siri, a li cincu, Cci vaiu,
pi diri, a la Matrici, lu Rusariu…
Cuomu ‘na vota, purtari Cci vuogghiu
bieddi mazzi di sciuri di inestra
d’unni ammazzaru a ddu bieddu cristianu,
e, ora, cu passa ci etta na petra,
nni la ‘mposta, a la via pi lu Cravaniu…
Sotto la guardia della grave mora,
il vento le move e l’acqua le bagna,
dicissi lu Nuostru, si l’ossa cci fùssiru
di re Manfredi, figghiu di Bianca
e di Federicu, ca nun vi dicu,
because Wikipedia says it for us,
e si fùssimu a Bari e no a Palermu,
in quel di Muntagna e di Sauchi,
e si traslatu già nun si l’avìssiru,
carni vattiata, ancora di friscu,
a lu sidduni, attaccatu di un mulu,
cuomu un truncu, cu na saccuòsima,
direttamenti a lu Campusantu,
not to the Old, but the New,
because it was , ago, fifty years…
Oppuru vaiu, e nn’aiu quantu nni vuogghiu,
nni la luntana Serra di lu suogghiu…
Tipu di sciuri variari vuogghiu,
ca cci n’è tanti, ca Vi cummuogghiu,
si nni sdavàcu na cartiddata
di quarchi finistruni, stile Lìberty,
cupunatu cu cutra di liettu,
sciuriata di ricami, a puntu cruci,
pi la Pricissioni di lu Tridici,
o di li ‘Ucciuna o di l’Arrighi…
Il tredici Maggio apparve Maria
a tre pastorelli in Cova d’Irìa,
cantanu, in coru, li Rabbatiddisi…
Paparini, piseddi sarvaggi,
iris, barcu, rosi, garofani
e, amati di mamma, tiritùppiti,
ca lu profumu t’alloppia e t’allalla
e, di tri fidi, una nni fai,
cu un sulu Patri e cu na sula Matri…
Di ogni campagna sciuri Cci cuogghiu,
Cci vaiu sulu e in cumpagnìa,
tantu stu misi è di trentunu iorna…
Oppuru vaiu, in landò, a lu Cassàru,
unni, inestri, alastri e liami
lu puostu pigghianu di li pagghiara,
li bieddi pagghiara di na vota,
e d’iddi arristaru li suli cassi,
di taiu e rina, nuddu li scassa...
e dintra lu cannisciu Cci li miettu,
supra lu marmu di la balaustra,
cuomu a li tiempi di Pietru Celestri
A Maria litanìi cantari vuogghiu,
Regina pacis, Regina di l’àngiuli,
e, sutta lu so’ mantu, ia m’ammucciu,
e, si cala lu suonnu, m’appinnicu…
Didacus
__________________________
nr.
d'ordine 6
Sauki Twitters’, Alia Sona’s,
Defragmentation
("Far poesie è come far l’amore: non si saprà
mai se la
propria gioia è condivisa" - Cesare Pavese - "Il
mestiere di
vivere")
£1
La cira squagghia, lu tiempu
scuddarìa,
lu vientu sciuscia e l’acieddu cilìa,
li cimi cutulìa, lu vientu, e spagghia,
pua cancia sunata e arrutulìa…
L’acieddu va circannu unni pusàrisi,
lu carcarazzu fà crà crà e
galleggia
cuomu ‘na barca supra un mari mossu,
ma ‘un è propia scantatu e ‘un è allarmatu
quannu la rama si cutulìa…
Di arii moti nun cci nn’è ariu,
e ll’àvi reggistratu nna lu geniu
c’àv’a dari la caccia a li nira
di cardiddi, pittiddi e cacanira,
lanciannu insistenti crà crà di guerra
chi lu lamientu di lu vientu vìncinu…
£2
Quis, cusì, cu sì?!...,
canta la cincia,
e pari propia ca nun si sapissi
cu sugnu, la bedda, sta matina…
Quòmodo? forsi diri mi vulissi,
ma è troppu limitatu lu latinu
pi cu ‘un è ciciruni o calandruni…
Cuomu và, sta matina, la carìna,
cu la performance di l’acquazzina
chi pirluci tra prieuli e viti,
mentri lu suli acchiana e duna luci
e, cu la luci, vita e vitamini,
di cui c’è gran bisuognu, in autunnu,
quannu, scurannu, lu picchiu, ti pigghia,
ti pigghia lu picchiu e la malinconia?!...
Ca ‘un è maggiu. ‘un è giugnu, ti lu dici
lu iarnu luccicari di li pampini,
e quarchi sgangu, manciatu di li vespi…
Ia, a lu quòmodo?, suoru, t’arrispunnu
e a tuttu chiddu chi dittu m’avissi:
Lu canciamientu ancora nun avvièrtinu
la mè culonna e li trentatrì vèrtebbri,
ma, lu tò ciricicì, amata cincia,
è signu sicuru ca lu tiempu cancia,
e si chistu, criatura, nun t’abbasta,
c’è l’acquazzina, chi fa sucu e pasta.
£3
Lu palummu fa cuomu un
lupunariu,
nni ‘na notti di luna, pi’ li strati,
si unchia tuttu cuomu un palluni,
mentri la fimmina consa lu niru,
circannu travuzzi, cu criteriu.
Picchì, sparramu puru st’armaluzzi,
ma nun diciemu ca su’ senza sienzu…
£4
Cristiani e armali sientinu lu
tiempu,
la iaddina carcarìa e ‘un àvi abbientu…
Lu iaddu canta e si la mutrìa…
Lu cielu smunci e si gnucculia…
Si metti a stizziari e pua chiovi di sistu:
cuomu si dici?!…a…’nzuppa viddanu!…
La iatta bianca di la zza Zidda
si marita cu la cuoppula di sita…
£5
Canta cuomu un ricignuolu
ed è iddu,
a Li Sauchi, arriva d’avance,
cu l’aria d’Aprili, lu biddazzu,
e cu du’ noti cuomu Diu cumanna
a l’autr’acieddi cci mettil’acqua ‘n ‘mmucca,
l’azzarinu di li cardidduzzi,
accussì bieddi ca pittati parinu,
lu cantu di ‘n’acieddu mistiriusu,
anticchia d’armaluzzu misiriusu,
fattu di musica tutta iucata
nni ‘na nota iauta e l’autra vascia,
ca fors’è chiddu chi chiamanu pittiddu……
E senza lintari, nuddu cchiù lu tinni,
pi’ tuttu lu iuornu e la notti appriessu,
ch’era ‘na notti di luna china,
cu quarchi interruzioni, cunsititi,
pi du’, tri sorsi d’acqua, nni la mùstica,
simili modo, ciconia, in fabula…
Didacus
__________________________
|
