nr. d'ordine 1
Semo todos camilleros...
Assittati a lu peri di brascera
tanti cosi l’antichi spurmintàvanu,
supra li iammi, lu scanaturi,
li granni facianu atti d’amuri,
cava, cavando, cavatella,
li picciriddi, la pasta, abbissàvanu;
fora, Ginuzzu, abbaiava a la luna,
aspittannu Calidda e canigghiuotti…
Me’ matri, me’ nonna, la zza Santina,
‘mpastavanu ‘na chilata di farina,
cu sulu sali e acqua di ‘nzira,
acqua di cubba, acqua di giebbia,
di sterna, di puzzu, di favàra
E, nna lu scanaturi, la scanàvanu,
e cu li bieddi manu la ciappiàvanu,
e cu lu sagnaturi, la sagnavanu,
cu uògghiu d’oliva la massaggiàvanu,
e, cu la lama, la sminuzzàvano…
Carmela, Santina , la nonna Nina,
di pasta pigghiavanu quantu tanticchia,
du’ pizzuddicchi, la zza Santina,
e, a la busa, la ‘mpiccicàvanu
e cu li manu l’arrutuliàvanu
e, da veri maistri di contralanza,
cu granni iattanza, lu fruttu, sfilàvanu…
Li cavatieddi, cu ali di cira,
vulavanu, a la raputa di la manu,
e supra criva di sita si pusàvanu…
La zza Santina, cu manu di fata,
dui nni mittìa, nna li criva di sita,
criva ad uocchi, parati di biancu…
Quannu, un migghiaru, di ‘na chilata,
di bruna farina di tumminìa,
chiàmali bòssoli o cavatieddi,
in ogni agnuni, avìanu atterratu,
prossimi, siemu, a la granni ‘nsucata…
Cci àvi la manu càura, Santina,
dicìa, me’ matri, di la vicina,
sùbitu, lu pani, cci scriscenta,
cu tuttu ca lu stissu è lu criscenti,
di li criscinteri, provenienti,
ora a lu musèu di Pitrè,
ca ‘un vannu avanti, senzacriscituri,
di Deodata e di Giuseppina,
li signorini di la duttrina,
amati suoru di Patri ‘Ucciuni,
ca, di Torretta, un uocchiu cci dava,
pi quantu pàrracu e prèsbiti sintùtu…
‘Un era dittu ca festa avìa a èssiri,
quannu li cavatieddi si facìanu,
ma era festa, picchì si facìanu…
Ma, pi’ Natali e pi’ Vecchia
Strina,
lu Iovi grassu, o di li cummàri,
lu Rabbatieddu s’avìa a cammarari,
cu sucu d’armalu chi l’ali scunciura
picchì, di Raggiura, s’arrizzulàu,
fin’all’omònimu vadduni,
secunnu ‘na cridenza popolari
picchì pistiari, chi veni da έστιάζω,
verbu chi ti metti in imbarazzu,
si nun si’ di Beòzia o ginnasiali,
tra quaranta e cinquanta, era campàri…
Didacus
__________________________
nr. d'ordine 2
Post-War Boom Natalicia
Caddiàvamu la crita cu passioni,
pigghiata d’arrietu a la Matrici,
pi’ fàrini pupiddi di Presepiu:
Giuseppi, Madonna, Bamminieddu
c’eranu, già, di prima di la guerra;
lu vuòi, lu sciccarieddu, lu spirdatu,
a cu ci manca la cura, a cu li corna…
C’eranu mastri fini, nni dda corti,
bravi nna l’opra e bravi a restaurari:
mittianu la cura a lusciccuzzu,
a lu vutieddu cci fannu li corna;
incuddavanu li minni a la vaccuzza
e un gnitu di lu peri aGisippuzzu.
Caddiàvanu e facìanu cuomu i pazzi;
‘n’autru spirdatu, picchì unu è picca;
piecuri, picurara e vaccaruotti;
crapi, crapara e ciaravidduzzi…
Quannu passu, la sira, d’ ‘u Villaggiu,
cu lu me’ carru, fideli a la Fiat
e a Gaspànu, Melchiònni e Batàssaru,
sempri truovu carusi a la via:
tutta la rriscinnenza di ‘Nnirìa,
cu la cura di l’uocchiu ti viu,
pi viola, gigghiati e scarpati,
cu tanta granni forza d’espanzioni,
da fari ‘mmiria puru a li ‘Ucciùna,
c’ànnu ittuna, filini e liami,
di Chianchiteddi a Santu Gimignanu,
ditta, da Danti, dalle belle torri,
e cci nn’è puru, nna li gialli pàggini,
nna chiddi bianchi e nna li citati
di Cola di Rienzo e di Uguccione,
di la pisedda e di la fasòla…
Andrea, Giuvanni, Peppi, Ustinè,
Nicola, Masi, Santu, Vicè,
tutti nnomi di santi a lu munti…
Si mi criditi, ‘na sira di chisti,
nenti cci lievu e nenti cci miettu,
iava a lu paisi, tonchi tonchi,
cu la me’ panda, uocchiu a la strata,
quannu v’a viu ‘na cosa accussì nica,
ca parìa un rizzitieddu cu du’ iammi,
nni lu trattu Villaggiu-Campusantu,
propia all’altizza di L’Animi Santi;
talìu beni, un bieddu picciriddu;
putìa èssiri Santu Giuvannuzzu
chi ghiava nni la matri Elisabbetta
ca s’attruvava nni so’ zza Marìa
c’aspittava a Gisuzzu ed era l’ura…
Mi fiermu e mi signu cu la manca,
e cci spìu senza fallu scantàri:
Cu si’, unni vai, o bieddu picciriddu?!…
e lu nnuccenti, spitittu, m’arrispunni:
Mi chiamu Gianni e vaiu nni me’ Matri
ch’è nni me’ Zzia, a li Casi popolari..
Era Cirinu e Battista mi parsi…
Didacus
__________________________
|
nr. d'ordine 3
Lu piru putiri, magno cum
amore
Lu piru putiri, piacìa, a papà mia,
lu vosi, in campagna, a du’ o tri banni,
e di lu peri di lu cumannu,
ancora, m’addumanna, nna li suonni,
e ia, c’ancora regna, cci arrispunnu…
Ma, cu tuttu c’amava lu putiri,
me’ pa’, era patri c’amari si facìa…
In fattu di pira era, capricciusu,
oltri a li bieddi pira metafòrici
lu vaccinella, ‘un nni fici mancari,
ca sapìa e sapi, ancora, di vitella,
lu piru coscia, cu bedda licenza
di li principi di Santu Vicienzu,
a cui, ogn’annu, lu cienzu, pagàvamu,
lu piru facci russa e facci
lorda,
spatuni, sclafanitu, virdi fattu,
e piru muscarieddu, cci dicìa,
cu’ li so’ connotati, a lu niputi.
E, puru, quannu picca cci virìa,
di lu piru putiri era a li tracci,
a lu mircatu di Villa Tasca,
oppuru a chiddu di Santa Rusulìa
Li pipi duci, piàcinu, a me’ suoru,
li fa gratinati, richini, infurnati,
di Capudannu a Santu
Silvestru,
cum et sine lu cupuliatu
cùius, lìbet, armalu di sangu’…
A mia, mi piaci, lu pummaramuri,
ia pasta e sarsa manciassi cotidie,
morning, menziuornu e pi’ la dinner,
e, in each case, lu cheese,
cci mittissi…
Si pua si’ crudeli e vua ca mi sciuogghiu
cuomu, di cira virgini, cannila,
sciauru di stigghioli fammi sèntiri
o d’agnidduzzu o di caprittieddu,
o di caprettu, stessu, spezzatinu,
chi cuòcinu, ‘n cucina, a fuocu lientu,
cu caciu, puddisinu e cipuddetta,
e, pua, mi puorti in sala da pranzu,
stava diciennu, in sala-partu,
fermu, ad aspittari la pitanza…
Ti rendi cuntu, nni sta circustanza,
quant’è giustu lu muttu chi dici
ca, veramenti, su’ dulura atroci,
aspittari, l’amanti, c’addimura…
Sunnu, propia, un supplizziu di Tàntalu,
You’re very bad e…di mia vua la peddi!…
Didacus
__________________________
nr. d'ordine 4
Ninnaredda
alisa
Nni
l’annu Domini, dumila e ùnnici
lu vinticincu di lu
bieddu
misi
ca veni lu friddu, iddu pi iddu,
puru si dicinu, cu degnazioni,
li ciciruna di la nazioni
ca usque ad
Pauli Fulgurationem
è sempri caura la situazioni…
Lu Bamminieddu
è nni la manciatura,
supra ‘na manna di pagghia d’avèna,
cu uocchi apierti e ghiammuzzi di fora,
asinu
e vùoi, pi
termusifuni,
e, patri, Giuseppi
e, matri, Maria,
cu l’uocchi si mancianu la Criatura,
duoppu ca tantu stintaru pi avìlla,
e pari ca dicissiru, estasiati:
Cu l’avìa a diri ca, nni la cunta
Caesaris
Augusti Imperatoris,
cci avìanu a
mettiri a nostru Signuri?!…
Inveci di ‘na Grutta,
viu un pagghiaru,
cu carpa di
frachi e ciraùna,
catinazzieddi e cannedda di sciumi,
un taddu di
zabbara, pi vastasu,
e lu spirdatu,
cu ll’uocchi di fora…
E, intantu arriva lu
picuraru
di la cuntrata di Mànnira
Nova,
cu ‘na lambretta, russa, fiammanti
e latti friscu, nni la sischitedda,
e caura ricotta, nni la fascedda…
E veni, veni, lu
forestali,
tri misi travagghia e novi abbattugghia,
cu ‘na manna di ligna di uscigghia:
‘U’ nn’aiu àutru, o Sacra Famigghia,
ca sta ramagghia pi la furnacella…
Li porta ‘n tanti, ‘na nivarriata,
li Tirminisi,
disoccupati ;
a lu Bamminu
si suttamièttinu,
e sulu ad Iddu,
ca è puvurieddu,
e cantanu in coru, marcannu la effe:
Fiat
voluntas…Fiat voluntas
di
l’Innuccenti di Betlemme…”…
A ppuostu di li
Mai di l’Orienti,
cci su’ li Savi
di li cuntrati:
Aspànu, Marchionni
e Batassaru,
ed ànnu ‘n manu rami di summaccu,
ca pi la concia di li pieddi siérvinu,
e ringrazianu a Ddiu
pi lu tanninu…
Lu primu scurava a Coscascinu,
l’autru si partìu di Bacuccu
e l’autru, ancora, vinni di lu Vaccu…
Strata nni ficiru pi lu Bamminu,
a la piduna, cuom’a Franciscu!
Didacus
__________________________
|
