La Stati

Ardi lu suli e li ristucci abbampa,

ardi comu lu fuacu di lu 'nfiernu,

ardi lu chianu, la vaddi e la timpa,

tuttu s'abbruscia 'nta stù fuocu eternu!

Sutta stù fuocu vannu a testi vasci,

c' un saccunazzu attaccatu a li spaddi,

li spicalori ca nuddu canusci,

sciarriannusi li spichi cu l'ariddi.

Sutta un peri di praniu s'arriposa,

cu lu saccuni misu a lu capizzu,

comu si fussi dintra a la sò casa,

un vaccarieddu stancu e sudatizzu.

'Nta la ristuccia un mulu 'mpasturatu

di muschi e tafanazzi lazzariatu,

sutta lu suli stà 'mpisulunatu

ca tantu è fermu, pari abbarsamatu.

Si senti un cantu, lientu e dilicatu,

lu cantu d'un viddanu suddisfattu,

di lu furmientu nuovu arricampatu,

di lu suduri sua fattu prufittu!

Eccu la stati di la terra mia,

nò chidda disiata di li strani,

ma stati di stienti e d'armunia

ca 'ncanciu di sangu cuncedi lu pani!

Cirinè
_______________________

L'elezioni di lu sinnacu

Taliu tutti li me paisani

ca su 'mpignati a fari l' elezioni.

D'un latu stannu li dimucristiani

di l'autru latu c'è l' opposizioni.

A Sinnacu si portanu du amici,

unu pi latu comu liggi voli.

Mi parinu du poviri 'nfilici

c'hannu a purtari 'ngruppa du gran moli.

No moli p'ammulari li cutedda,

ma moli di mulinu di vadduni.

Parinu pisci dintra la paredda

c'arrustinu pi farisi muccuna.

Muccuna pi lu populu affamatu

di travagghiu, di sordi e di giustizia,

ca s'arrifrisca, 'ntantu, lu palatu

sparranu li sfidanti cu malizia.

E chissi sù li moli di purtari

fin'a lu iornu di l' acclamazioni.

Certu cci voli forza a suppurtari

chiddu chi dici la pupulazioni.

E 'ntantu, ogni duminica la sira,

li du sfidanti fannu lu cumiziu

e pari ca di fari molla e tira

ancora nun si levanu lu viziu.

Matté c' avi l'amici a la Matrici,

e forsi quarched'unu 'ntà lu chianu

cunfida 'ntà lu scutu cu la cruci

pi futtiri lu puostu a Gaitanu.

Taninu c'a lu chianu avi l'amici

e quarched'unu 'nta lu rabbatieddu,

pi futtiri a Matté cu scutu e cruci

s'affida sempre a fauci e martieddu.

Unu cci dici all'autru: mafiusu,

'ncapaci, fanfaruni e priputenti;

e chiddu cci rispunni: si vavusu,

cu ssi paroli 'nganni la me genti.

Taninu dici: cu picca dinari

fici canciari facci a lu paisi.

Matté rispunni: nun nni pua cuntari

la stissa cosa pi tuttu lu misi.

P'un misi si cunnuci la vicenna

ed'a la fini c'è lu risultatu.

Taninu vinci, s'assetta e guverna!

Matté all'opposizioni è cunnannatu.

Lu populu talia, s'affriggi e taci

siddu li cosi un vannu comu voli.

All'autra cursa vota pi la cruci,

e si la cruci un c'è cci sù li poli.

Chianciti genti e, a lacrimi di sangu,

tincitili di russu stì maceri;

addrivucati, cupriennuli di fangu,

li muorti, li dulura e li miseri.

Lavàtivi li chiaj cu la nivi,

cu lu curaggiu cusiti li feriti,

a li malati stagghiaticci la frevi

cu stierru di li casi sdirrubbati.

'Nchianati petri, ligna e quacinazzi

scavannu sulu cu li vostri manu;

scurdativi chist'ura di disgrazi,

lu sangu di li muorti nun è vanu.

Rifabbricati casi e monumienti,

scoli spitala e casi comunali,

faciti puru chiesi pi li Santi

e staddi nuovi pi li vostri armali.

Sparati a li sciacalli e a li sanzali,

chi viennu pi sucarivi lu sangu,

ca sunnu besti peggiu di l' armali

e 'ntà la sucità nun hannu rangu.

Aiutu vinn'arriva d' ogni latu,

di poviri e di ricchi a vrazza apierti;

vui cu li petri di lu tirrimotu

faciti un munumientu pi li muorti.

Lu Papa

Di Papa nn'haiu vistu na cinchina

ma, nuddu m'ha piaciutu comu chistu

c' avi l'aspiettu di pirsuna fina

ed' ha suffrutu comu un veru Cristu!.

Piu dudicesimu, Principi Rumanu,

omu allittratu e gran puliticanti,

passava tra la fudda 'ncapu un tronu,

sempri atturniatu d'uomini putenti!

Papa Giuvanni, sempri risulenti,

era lu Papa cchiù simpaticuni;

c'allegru discurria cu li putenti

e amicu si dicia di lu latruni!

Paulu Sestu, omu di gran 'ngegnu,

severu, 'ntilliggenti e giudiziusu,

contru lu mali si battì cu sdegnu,

di lu trirregnu nni fici bon'usu!

Giampaulu lu Primu, mischinieddu,

appi lu tiempu di farini un surrisu

e, duoppu appena un misi, puvurieddu,

cu l'anciuli vulau 'nparadisu!

Giampaulu Secunnu è un Papa veru,

un Papa c' ha suffrutu fami e peni!

Giustu Ministru a giustu Ministeru

ca vera forza e fidi lu susteni!

Fu omu, fu surdatu e minaturi,

atturi, fu pueta e 'nnarnuratu,

veru Vicariu di Cristu Redenturi,

di Cristu a lu papatu cunsacratu!

Quannu lu vitti pi la prima vota,

cu li manu affirrati a lu mantellu,

ia dissi : di sta mossa si ddinota

ca sarà un Papa senza protocollo !

Facci rusciana, uocchi a pampinedda,

surrisu largu, apiertu a lu discursu,

abbrazza genti ricca e puvuredda

propria comu San Paulu di Tarsu!

Mi piaci quannu passa tra la fudda,

a piedi, senza seggia gistatoria,

nuddu mi leva di 'ntà la mirudda

ca certu chistu, è un Papa chi fa storia!